Inuit Pisinnaatitaaffiini Periutsit
Naalagaaffiit Peqatigiit (FN)– nunarsuaq tamakkerlugu sakkoq
Sorsunnersuup aappaata kingorna naalagaaffiit arlallit Naalagaaffiit Peqatigiit (FN) 1945-imi pilersippaat, tassani siunertaalluni naalagaaffiit akornanni piujuartumik eqqisseqatigiinnissap qulakkeerneqarnissaa. FN-ili inuit ataasiakkaat tunngaviusumik inuttut pisinnaatitaaffiisa innarlerneqariaannaanermullu illersuinissaq qulakkeerniarlugit suli suliuniuteqarpoq. Suliaqarnerup ilaatigut Inuit Pisinnaatitaaffii pillugit Nunarsuarmi Nalunaarut FN-ip Ataatsimeersuarnerani 1948-imi akuerineqarpoq. Nalunaarut aalajangersakkani, nalunaarutini inatsisinilu arlalli najoqqutarineqartarpoq, nalunaarulli nammineq inatsisilerinermi pituttuutaanngilaq. Nalunaarutip pituttuutaannginnera pissutigalugu isumaqatigiissutit arlallit naalagaaffinnut FN-imi ilaasortanut taakkuninnga atsiuisunut atortussanngortitsisunullu inatsisitigut pituttuutaasut FN-imi akuerineqarput.
Europarådi – nunarsuup immikkoortuani sakkoq
Europarådi 1949-imi pilersinneqarpoq, ullumikkut naalagaaffiit namminersortut 47-t akornanni suleqatigiinnermut sinaakkutaalluni. Naalagaaffinnit taakkunannga 28-t aamma Den Europæiske Union-imi ilaasortaapput. Europarådimi siunertaavoq naalagaaffiit siunnersuisoqatigiinni ilaasortat akornanni ataatsimooqatigiinnerunissaq, anguniagaallunilu naalagaaffiit akornanni ataatsimut kingornussanik illersuinissamik anguniakkat tunngaviillu illersorneqarnissaat piviusunngortinneqarnissallu. Europarådip Europami Inuit Pisinnatitaaffii pillugit Isumaqatigiissut (EMRK) 1950-imi akuerineqarpoq 1953-imilu atuutilersinneqarluni. Isumaqatigiissut Danmarkimi inatsisinut 1992-imi ilanngunneqarpoq 2001-imilu Kalaallit Nunaannut atuutilersinneqarluni. Tamassuma kingorna isumaqatigiissutit allarpassuit Europarådimut akuerineqarnikkuupput, ataasiakkaallu Kalaallit Nunaannut atuullutik, soorlu Naalagaaffimmi innuttaasinnaatitaaneq pillugu Europami isumaqatigiissut, Europap immikkoortuini oqaatsit ikinnerussuteqartulluunniit oqaasii pillugit Europami angerfigeqatigiinneq kiisalu naalliutsitsisarnerup inuppalaanngitsumillu pinnittarnerup pigiveersimatinneqarnissaat pillugit Europarådimi Isumaqatigiissut.
Inuit Pisinnaatitaaffii pillugit Europami Eqartuussivik
Inuit Pisinnaatitaaffii pillugit Europami Eqartuussivik 1959-imi pilersinneqarpoq, Inuit Pisinnaatitaaffii pillugit Europami Isumaqatigiissutip malinneqarnissaa aamma innuttaasut naalagaaffiillu isumaqarunik inuttut pisinnaatitaaffiit innarlerneqartut isumaqarunik naammagittaalliuteqarnissamut periarfissinneqarnissaat. Nunat ilaasortat tamarmik, taakkununnga Kalaallit Nunaat aamma ilanngullugu, Inuit Pisinnitaaffii pillugit Europami Eqartuussiviup aalajangigai ingerlaavartumik malittassavaat. Naalagaaffiit taamaalillutik inatsisit periutsillu aaqqiiviginissaannut pisussaatitaaffeqarput, taamaalilluni Inuit Pisinnitaaffiip illugit Europami Eqartuussiviup aalajangigai eqqortinneqassallutik.