Inuit Pisinnaatitaaffiinik Suliaqarfiit
Inuit Pisinnaatitaaffii pillugit FN-imi Siunnersuisoqatigiit
Inuit Pisinnaatitaaffii pillugit Siunnersuisoqatigiit 15. Marts 2006 pilersinneqarput, taamaalillunilu inuit pisinnaatitaaffii pillugit FN-imi kommissioni taarserlugu. Inuit Pisinnaatitaaffii pillugit Siunnersuisoqatigiit suliassaraat inuit pisinnaatitaafiisa kikkullu tamarmik kiffaanngissuseqarnissaa siuarsarnissaat illersornissallu, pisinnaatitaaffiillu innarlerneqannginneri atuutitissaallugit misissussallugulu. Siunnersuisoqatigiit aamma inuit ilinniagaqarsinnaatitaanerisa siuarsarnissaa, siunnersuisarissaa teknikkikkullu ikiuunnissaq piginnaasaqalernissarlu akisussaaffigaat – tassa assersuutigalugu eqqartuussiveqarfiup annertusarnissaanik ineriartortinnissaanillu naalagaaffiit ikiussallugit.
Kingullertut minnerunngitsumillu naalagaaffiit innuttanut pisussaaffii ineriartortinniarlugit FN-ip Ataatsimeersuarneranut naalagaaffiillu inuit pisinnaatitaaffiinik pisussaaffeqarnerisa tamakkiisumik piviusunngortinnissaanik inassuteqaateqartarnermut siunnersuisoqatigiit tapersiisissapput. Inuit Pisinnaatitaaffiit pillugit FN-imi Siunnersuisoqatigiit pilersinneqarnerisigut inuit pisinnatitaaffii FN-imi annertuumik oqaluuserisassangortinneqarput aamma inuit pisinnaatitaaffii pillugit siunnersuisoqatigiit FN-imi ullumikkut aaqqissuussamik inissisimapput.
Inuit pisinnaatitaaffii pillugit FN-imi Siunnersuisoqatigiit Genèvemi angerlarsimaffeqarput FN-illu Ataatsimeersuarnerata toqqaannartumik ataaniillutik. Siunersuisoqatigiit 47-nik ilaasortaqarput, agguarneqarlutik Afrikamit 13-it, Asiamit 13-it, Europap kangianit arfinillit, Latinamerikamit Caribiamilut naalagaaffinnit arfineq pingasut aamma Europa killermit arfineq marluk. Ilaasortat tamarmik FN-imi Ataatsimeersuarnermut ilaasortanit amerlanerussuteqartunit toqqarneqartarput. Inuit pisinnatitaaffii pillugit siunnersuisoqatigiinni ilaasortat ukiunut pingasunut qinigaasarput qinigaaqqissinnaallunillu – taamaallaalli qinigaaffinni marlunni.
Inuit Pisinnaatitaaffii pillugit Siunnersuisoqatigii nakkutiliinermi arlalinnik sakkueqarput, taakkulu isumaqatigiissutinut pingaarnernut ataasiakkaanut atanngillat. Ilaatigut pineqarput Nunarsuaq Tamakkerlugu Piffissamut FN-imi Naliliisarneq (Universal Periodic Review - UPR). Tamanna pillugu annertunerusumik uani atuarit.
Maalaarutinik suliaqartarneq Inuit Pisinnaatitaaffi pillugit FN-imi Siunnersuisoqatigiit nakkutilliinerannut atanngilaq. Naalagaaffinni ilaasortani inuit pisinnaatitaaffiinik innarliinerit uteqattaartut, uppernarsarneqartut annertuullu siunnersuisoqatigiit suliarisarpaat.
Inuit Pisinnaatitaaffii pillugit FN-imi Komitét
Inuit pisinnaatitaaffii pillugit FN-imi komitét tassaapput nakkutilliiviit immikkut ilisimasalinnik sumulluunniit attuumassuteqanngitsunik ilaasortallit. Pingaarnertut suliassaraat naalagaaffiit isumaqatigiissutinik naalagaaffiit akuerisaannik eqqortitsinerannik nakkutilliineq. Nalagaaffiit komiténut nalunaarusiortussaatitaapput, taakkunani inatsisini suliaraatsinilu pisinnaatitaaffiit isumaqatigiissummi allaqqasut qanoq qulakkeerneqarnersut allaaserineqartarput. Komitét pissutsit pillugit apeqquteqarsinnaaput paasissutiisoqarnerunissaanillu qinnuiviginnissinnaallutik. Komitét pisut ilaanni innuttaasunit isumaqartunit pisinnaatitaaffitik innarlerneqartut maalaarutinik tigusaqarsinnaapput.
Danmarki pillugu Inuit Pisinnaatitaaffii pillugit FN-imi Komiténut, Ameq Tunngavigalugu Assigiinngisitsineq pillugu Komitémut, Naalliutitsisarneq pillugu Komitémut, Innarluutillit pillugit FN-imi Komitémut, Meeqqat pillugit FN-imi Komitémut, Innuttaasutut politikkikkullu pisinnaatitaafiit pillugit FN-imi isumaqatigiissut, naalliutsitsisarnermik akiuiniarneq aamma sakkortuumik, inuppalaanngisumik nakkarsaallunilu pinnartarneq pillaasarnerluunniit pillugit FN-imi isumaqatigiissut, arnanik immikkoortitsisarnernik sunilluunniit akiuiniarneq pillugu FN-imi isumaqatigiissut, inuit innarluutillit pisinnatitaaffii FN-imi isumaqatigiissut aamma meeqqat pisinnaatitaaffii pillugit FN-imi isumaqatigiissut naapertorlugitullumikkut naammagittaalliortoqarsinnaavoq.