Ineqarnissamut pisinnaatitaaffik – kalaallit nunaanni killiffik 2020

Nalunaarusiami siullermik suliassaqarfimmi ineriartorneq naatsumik nassuiarneqarpoq. Tulliullugu pingaarnersiuilluni suliassaqarfimmi inuit pisinnaatitaaffii nassuiarneqassapput, kiisalu Kalaallit Nunaanni innuttaasut aarlerinartorsiortut inissiamut isersinnaanerat qanoq innersoq. Tamatuma saniatigut FN-ip atasinnaasumik ineriartortitsinissamut nunarsuarmi anguniagaasa Kalaallit Nunaanni ineqarnermut suliassaqarfimmut attuumassutaat aamma nassuiarneqassaaq.

Nalunaarusiami sammisat sisamat toqqarneqartut ukkatarineqarput, innersuussisoqarlunilu Kalaallit Nunaanni inuit pisinnaatitaaffii sukkut nukittorsarneqarsinnaanersut. Sammisat tassaapput:

• Angerlarsimaffeqanngitsut, inisseqqitat aamma inissaaleqisut
• Pinngitsaaliilluni anisitsinerit
• Ineqarneq pillugu Maalaaruteqartarfik
• Paasissutissat pissarsiarisinnaasat

Nalunaarusiami innersuussutit pingaarnerit

Ilaatigut innersuussutigaarput, Naalakkersuisut kommunit peqatigalugit:

1. Angerlarsimaffeqanngitsut, inisseqqitat aamma inissaaleqisut pillugit nuna tamakkerlugu iliuusissatut pilersaarummik ataatsimoortumik akuersissuteqarlutillu naammassinnissasut, innuttaasut ilaqutariillu ikiorneqarnissaat qulakkeerniarlugu, inuttut aningaasaqarnikkullu inissisimanerisa pitsaanngorsarnissaa periarfissinniarlugu kiisalu inissiamik tulluartumik nassaarnissaannut ikiorniarlugit.
2. Qulakkiissagaat, ilaqutariit ukiukitsunik meerartallit inissiani ilaqutariit saniatigut allanik inoqartunut inisseqqinneqartassanngitsut.
3. Inisseeqqittarfiit pillugit minnerpaaffissanik eqqussissasut, matuma ataani kiassarneq, innaallagiaq, perusuersartarfik uffarfillu atoriaannaat pillugit piumasaqaateqartoqassasoq.
4. Qulakkiissagaat, ineqarnermut suliassaqarfimmi ineriartorneq pillugu ilisimasanik paasissutissanillu pissarsisoqassasoq nutarsaasoqassasorlu, matuma ataani inuit aalajangersimasumik najugaqanngitsut aamma pinngitsaaliilluni anisitsinerit amerlassusai misissorneqassasut.