Institutti 2018-imi Kalaallit Nunaanni sulinini pillugu nalunaarusiorpoq
Instituttip 2018-imi nalunaarutaa Kalaallit Nunaanni Inatsisartunut tunniunneqaqqammerpoq. Nalunaarutip pisimasut arlallit tikkuarpai, Kalaallit Nunaanni inatsisit nutaat inunnik pisinnaatitaaffinnik nukittorsaasimaneri, aammali naqissuserlugu, inuit pisinnaatitaaffiini annertuunik suli unammillernartoqartoq, kiisalu alloriarnissat pisariaqartut qulakkiissallugit paasissutissanik ilisimasanillu piviusunik pamerlanerusunik pisariaqartitsisoqartoq.
Kalaallit Nunaanni Inuit Pisinnaatitaaffiinut Siunnersuisoqatigiinnik nukittorsaaneq
2018-imi pisut pingaarnersaasa ilaat tassaavoq inatsimmik nutaamik, Kalaallit Nunaanni Inuit Pisinnaatitaaffiinut Siunnersuisoqatigiinnik Naalakkersuisunut attuumassuteqannginnerulersitsisumik akuersissuteqarneq. Siuariarneq pingaarutilik, tamatuma ilaatigut imaraa, siunnersuisoqatigiinnut ilaasortat Naalakkersuisunit toqqarneqassaarnerat.
”Inuit pisinnaatitaaffii pillugit suliassaqarfimmi suliffeqarfinnik nukittuunik peqarneq aalajangiisuuvoq, taamaattumik pingaaruteqarpoq, Kalaallit Nunaanni Inuit Pisinnaatitaaffiinut Siunnersuisoqatigiit attuumassuteqannginnerulernerat kiisalu sinaakkusiussani piumasaqaatinik pitsaanerusunik peqalernerat. Instituttip tungaaniit ilaatigut nuannaarutigaarput, siunnersuisoqatigiit maanna periarfissaqalermata namminneq allattoqarfimminnik pilersitsinissaminnut,” taama oqarpoq Jonas Christoffersen, Inuit Pisinnaatitaaffiinut Insituttimi pisortaq.
Suleqatigiinneq pitsaasoq
Inuit Pisinnaatitaaffiinut Instituttip Kalaallit Nunaanni inuit pisinnaatitaaffii illersorniarlugit siuarsarniarlugillu oqartussaasut kattuffiillu suleqatigai. Assersuutigalugu instituttip Ilisimatusarfik – Grønlands Universitet – suleqatigalugu Kalaallit Nunaanni eqqartuussiveqarfimmi nutserisuuneq pillugu nalunaarusiamik suliaqarpoq, nutserinermut sinaakkutit qanoq pitsanngorsarneqarsinnaaneranik innersuussutinik arlalinnik imaqartumik.
Tamatuma saniatigut institutti Kalaallit Nunaanni meeqqat pisinnaatitaaffii siuarsarniarlugit suli annertuumik ukkataqarpoq. Assersuutigalugu meeqqat pisinnaatitaaffiinik sullissivik MIO peqatigalugu ilinniartitsisunngorniat meeqqat pisinnaatitaaffii aamma akisussaaqataanerat pillugit atuartissimavagut.
Innarluutillit pillugit suliassaqarfimmi unammillernartut
Instituttip pisuni arlalinni, Kalaallit Nunaanni innarluutillit pillugit suliassaqarfimmi inuit pisinnaatitaaffii pillugit annertuunik unammilligassaqartoq tikkuartarpaa, tamatuma nassataraa, innarluutillit taakkulu ilaqutaasa Kalaallit Nunaat qimattariaqarlugu misigisartut. Taamaattumik aalajangiisuussaaq, maanna pitsanngoriartoqarnissaa, kiisalu suliniarneq siumut sammiinnarnissaa aalajangiusimaneqassasoq.
Suliassaqarfimmi alloriarnerit pingaarnersaasa ilaat tassaavoq inatsimmik nutaamik, kommunit aamma Naalakkersuisut inunnik innarluutilinnik tapersersuinissamut pitsaanerusumik periarfissiisumik akuersissuteqarneq. Instituttip pitsaasutut isigaa, inatsimmik aaqqissuusseqqinnermi innarluutillit pillugit isumaqatigiissummi tunngavigisat aallaavigineqartut, suliassaqarfiullu pisariaqartinneqartumik ukkatarineqalernera.
”Kalaallit Nunaata nunataata annertuumik unammillernartuutippaa, inuit innarluutillit tapersersorneqarneq aamma angalasinnaaneq pisussaaffigisaat tunniutissallugu, tunngaviusumillu amigaatigaagut inuit innarluutillit inuunerminni atugarisaat pillugit ilisimasat paasissutissallu. Taamaattumik pingaaruteqarpoq, innarluutillit pillugit suliassaqarfik annertuumik pingaartinneqassasoq, pitsaasuuvorlu, maanna inatsisini siuariarnernik takugatta,” taama oqarpoq Jonas Christoffersen.
Inatsit 1. januar 2020 atuutilissaaq.