Kalaallit Nunaanni spiralilersuineq inuit pisinnaatitaaffiinik annertuumik innarliivoq
DR-kkut tusarnaagassiaq naapertorlugu, danskit nakorsat 1966-imiit 70-ikkunnut arnat inuusuttut inersimasullu meerartaarsinnaasut 9000-it affaasa missaat spiralilerpaat.
Tusarnaagassiaq naapertorlugu 13-iinnarnik ukiulinnut allaat- arnallu angajoqqaalluunniit akuersiseqqaarnagit spiralilerneqarsimapput.
Akuersisisitseqqaarani spiraliliineq arnat inuusuttut inersimasullu namminneq aalajangiisinnaanerannik annertuumik innarliineruvoq nikanarsagaanerusinnaalluni inuppalaannginnerusinnaallunilu.
Inuit Pisinnaatitaaffii pillugit Siunnersuisoqatigiit Inuillu Pisinnaatitaaffii pillugit Institutti taama naliliiput.
”Akuersisitseqqaarani kalaallit arnataannik inuusuttunik inersimasunillu aaqqissuussamik spiralilersuisoqarsimanera Siunnersuisoqatigiinni quarsaarutigeqaarput. Suliaq imaannaanngeqisutut tiguarput. Matumani pineqarput inuit pisinnaatitaaffiinni annertuumik innarliinerit annertoorujussuusinnaasut,” Qivioq Løvstrøm, Inuit Pisinnaatitaaffii pillugit Siunnersuisoqatigiinni siulittaasoq oqarpoq.
Inuit Pisinnaatitaaffii pillugit suliniaqatigiit taakku marluk, suliami danskit naalagaaffiata akisussaaffimminik misissuinissaanut inatsisitigullu kinguneqartitsinissamut siunnersuuteqarnissaanut kaammattuipput:
”Arnat ataasiakkaat akisussaaffiup akuerineqarnissaanik taarsiiffigitinnissamillu immikkut noqqaasariaqanngillat. Danskit naalagaaffiat oqaluttuarisaanermi pisuni allani utoqqatertareerpoq taarsiisareerlunilu. Naalagaaffik matumanissaaq taamaaliortariaqarnersoq misissorneqartariaqarpoq,” Inuit Pisinnaatitaaffii pillugit Instituttip pisortaa Louise Holck oqarpoq.
”Naalagaaffiup spiralilersuinermut tunngatillugu akisussaaffimminik misissuinerani, 1953-imi pisortatigoortumik nunasiaataajunnaarnerup kingorna, inuit pisinnaatitaaffiinik innarliisoqarsimanersoq qulaajaaviginiarlugu suliaq aallartinneqqartariaqarportaaq, tamanna nunap inoqqaavisa pisinnaatitaaffiinik- ilaatigut peqqinnissamut, inuttut atukkatigut qulakkeerinermut, kinaassutsimut kulturimullu illersuinissaq eqqarsaatigalugu pisussaafeqarnertut isigineqassaaq,” Inuit Pisinnaatitaaffii pillugit Siunnersuisoqatigiini siulittaasoq Qivioq Løvstrøm naggasiivoq.