Kalaallit Nunaanni inuiaqatigiit, peqataatitsineq aamma Innarluutillit pillugit politikki
Kalaallit Nunaanni oqartussaasut NP-p Innarluutillit pillugit isumaqatigiissutaannik malinnittussaapput. Ilaatigut taamaaliussapput inatsisinik aamma politikkinik, inuiaqatigiinni immikkoortuni assigiinngitsuni inuit innarluutillit naligiissumik periarfissaanik siuarsaasunik ineriartortitsinikkut naammassinninnikkullu. Tamatumunnga atatillugu oqartussaasut inuiaqatigiit, matuma ataani Kalaallit Nunaanni innarluutillit peqatigiiffii tusarniaavigissallugit peqataatissallugillu pisussaaffigaat. Peqataatitsinerup tamatuma qulakkiissavaa, inuit innarluutillit aalajangiiniarnernut, namminneq inuunerminnut, ulluinnarminnut aamma pisinnaatitaaffitsigut illersorneqarnerminnut attuumassuteqartunut sunniisinnaanerat, tamatumuunakkullu innarluutillit pillugit immikkoortumi allannguinissamut piginnaasanik, piukkunnaatinik aamma isiginnittaatsinik tunniussaqarsinnaallutik.
Allakkiaq una Kalaallit Nunaanni Inuit Pisinnaatitaaffii pillugit Siunnersuisoqatigiit, Inuit Pisinnaatitaaffii pillugit Instituttip aamma Meeqqanut, Inuusuttunut Ilaqutariinnullu Naalakkersuisoqarfiup (siullermik Isumaginninnermut Inatsisinillu Atuutsitsinermut Naalakkersuisoqarfik) akornanni Kalaallit Nunaanni innarluutillit pillugit suliassaqarfimmi inuiaqatigiinnik peqataatitsineq pillugu suleqatigiinnermut isumaqatigiissummik (pingasuulluni suleqatigiinneq) naggasiisuuvoq.
Allakkiaq Kalaallit Nunaanni Inuit Pisinnaatitaaffii pillugit Siunnersuisoqatigiinnit kiisalu Inuit Pisinnaatitaaffii pillugit Instituttimit ataatsimut suliarineqarlunilu saqqummiunneqarpoq. Meeqqanut, Inuusuttunut Ilaqutariinnullu Naalakkersuisoqarfik suliaqarnermi ingerlaavartumik peqataatinneqartarpoq, pingasuullunilu suleqatigiinnermi allakkiamik piareersaanermi pingaarutilimmik inissisimasimalluni. Allakkiaq innarluutillit peqatigiiffiinut ataasiakkaanut kiisalu Innarluutillinnut Illersuisoqarfimmut, Tiliumut tusarniaassutigineqarsimavoq.
- Immikkoortoq 1, NP-ip Innarluutillit pillugit Isumaqatigiissutaata Kalaallit Nunaannut eqqunneqarnissaa pillugu tunngaviusunut kiisalu isumaqatigiissummi pisussaaffinnut aalajangersimasunut naatsumik ilisarititsinermut tunngavoq.
- Immikkoortoq 2, saqqummiunneqarput sammisat Inuit Pisinnaatitaaffii pillugit Siunnersuisoqatigiit, Inuit Pisinnaatitaaffii pillugit Instituttip aamma Meeqqanut, Inuusuttunut Ilaqutariinnullu Naalakkersuisoqarfiup akornanni suleqatigiinnissamut isumaqatigiissummit pinngortut, matuma ataani sammisanit suleriaatsit atorneqartut aamma misilittakkat.
- Immikkoortoq 3, Kalaallit Nunaanni innarluutillit pillugit suliassaqarfimmi inuiaqatigiinnik peqataatitsinermut tunngavinnik arlaqartunik inissiivoq nassuiaaffiullunilu.
Vi tilstræber, at vores pdf’ede publikationer m.m. er egnede til at blive læst af skærmlæser. Skulle du opleve problemer, så kontakt venligst digital redaktør, Stine Juhl Nielsen på stni@humanrights.dk
