Kalaallit Nunaanni angerlarsimaffeqanngitsut aamma ineqarnissamut pisinnaatitaaffik pillugit killiffiit
Angerlarsimaffeqanngitsut, pinngitsaaliissummik anisitsinerit, ineqarneq pillugu maalaaruteqartarfik aamma paasissutissat pissarsiarineqarsinnaasut. Sammisat taakku sisamat nalunaarummi nutaami 'Ineqarnissamut pisinnaatitaaffik – Kalaallit Nunaanni killiffik 2020' qanimut misissorneqarput.
Inuit Pisinnaatitaaffii pillugit Institutti aamma Kalaallit Nunaanni Inuit Pisinnaatitaaffii pillugit Siunnersuisoqatigiit siullermeerlutik ineqarnissamut pisinnaatitaaffik pillugu killiffissiorput. Nalunaarummi tikkuarneqarput, Kalaallit Nunaata suut unammilligassarinerai kiisalu Naalakkersuisut kommunit suleqatigalugit innuttaasut ineqarnissamut pisinnaatitaaffiat qanoq nukittorsarsinnaaneraat pillugu innersuussutit.
Angerlarsimaffeqanngitsut, inisseqqitat aamma inissaaleqisut
Inuup ineqarnissamut pisinnaatitaaffia pissutsini arlalinni unammillernarsinnaasarpoq – tamanna aamma Kalaallit Nunaannut maannakkorpiaq atuuppoq. Taamaattumik politikkikkut iliuuseqartoqarnissaa pisariaqartinneqarpoq.”
Kalaallit Nunaanni innuttaasut, angerlarsimaffeqanngitsuusut, inisseqqitaasut imaluunniit inissaaleqisuusut inuttut ilaqutariinnermilu inuunermi toqqissisimasumik sinaakkutinik pilersitsinissamut periarfissaqarluanngillat. Nappaammik, inuuniarnikkut ajornartorsiutinik imaluunniit annertunerusumik innarluummik eqqugaasimagaanni, imminut pilersornissaq ajornakusoorsinnaavoq, taamaasillunilu inissamik tulluartumik pissarsinissaq ajornarnerusinnaalluni.
Taamaattumik Kalaallit Nunaanni Inuit Pisinnaatitaaffii pillugit Siunnersuisoqatigiit aamma Inuit Pisinnaatitaaffii pillugit Instituttip innersuussutigaa, Naalakkersuisut kommunit peqatigalugit angerlarsimaffeqanngitsut, inisseqqitat aamma inissaaleqisut pillugit tamakkiisumik nuna tamakkerlugu iliuusissatut pilersaarummik akuersillutillu naammassinnissasut, tassani qulakkeerniarlugu innuttaasut ilaqutariillu taakku tapersersorneqarnissaat, inuuniarnikkut aningaasaqarnikkullu inissisimanerminnik pitsaanerulersitsinissamut kiisalu inissamik tulluartumik nassaarnissamut ikiorneqarnissamut periarfissamik qulakkeerinnittumik.
Paasissutissat pissarsiarineqarsinnaasut
Innuttaasut atugarliortut atugaannik pitsanngorsaanissamut unammilligassaq alla tassaavoq, paasissutissanik amigaateqarneq, misissuinerni aamma Kalaallit Nunaanni ineqarneq pillugu suliassaqarfik pillugu ingerlaavartumik paasissutissanik katersisarnermi.
Naligiinnginnermik aamma immikkoortitsinermik, innuttaasut aningaasaqarnikkut, inuuniarnikkut aamma kulturikkut pisinnaatitaaffinnik, soorlu ineqarnissamik eqquutsitsinissamut akornutaasinnaasunik ajornartorsiutinik paasinninnissaq aamma nakkutiginninnissaq periarfissaassappat, ilisarnaatinut naleqquttunut agguakkamik paasissutissanik pissarsisinnaasoqartariaqarpoq.
Taamaattumik Kalaallit Nunaanni Inuit Pisinnaatitaaffii pillugit Siunnersuisoqatigiit aamma Inuit Pisinnaatitaaffii pillugit Instituttip innersuussutigaat, Naalakkersuisut kommunit peqatigalugit qulakkiissagaat, ineqarneq pillugu suliassaqarfimmi ineriartorneq pillugu ilisimasanik paasissutissanillu pissarsisoqarlunilu nutarsaasoqartassasoq. Tamatumani aamma ilanngunneqartariaqarpoq inuit aalajangersimasumik najugaqanngitsut aamma pinngitsaaliissummik anisitsinerit amerlassusaanik misissuinerit.
Nalunaarummi sammisat tamaasa pillugit paasisaqarnerugit.