Arnat pisinnaatitaaffii pillugit isumaqatigiissut atuaruminarsagaq arnat pisinnaatitaaffii pillugit ilisimasanik annertusaassaaq
Kalaallit Nunaanni Inuit Pisinnaatitaaffii pillugit Siunnersuiusoqatigiit, Inuit Pisinnaatitaaffii pillugit Institutti nunatsinnilu Naligiissitaanermut Siunnersuisoqatigiit suleqatigalugit, Naalagaaffiit Peqatigiit arnat pisinnaatitaaffii pillugit isumaqatigiissutaat atuaruminarsarlugu suliaraat. Arnat pisinnaatitaaffii pillugit isumaqatigiissut naalisagaq oqaatsinut assigiinngitsorpassuarnut – maannalu aamma kalaallisut nutsigaavoq.
”Arnat pisinnaatitaaffii pillugit isumaqatigiissutip atuaruminarsakkap nunatsinni naligiissitaanermut ullorititaasoq eqqorlugu saqqummiussinnaanera tulluusimaarutigaarput. Pisinnaatitaaffiit, Killiliisamut Danmarkillu kalaallit arnat niviarsiaqqallu pisinnaatitaaffiinik innarliineranut qanittukkut saqqummersumut tunngatillugu, kivitseqataasinnaapput,” Qivioq Løvstrøm, Kalaallit Nunaanni Inuit Pisinnaatitaaffii pillugit Siunnersuisoqatigiinni siulittaasoq oqarpoq.
Arnat pisinnaatitaaffii pillugit isumaqatigiissummi immikkoortut nunatsinni innuttaasunut ataasiakkanut paasinarsarlugit atuaruminarsarlugillu kalaallisuunngortinneqarput.
”Arnat piumasaqaateqarsinnaanngorlutik pisinnaatitaaffitik ilisimassavaat. Naalagaaffiit Peqatigiit isumaqatigiissutaannik tunaartaqaraanni, pisinnaatitaaffimmik piumasaqaateqarnissaq arnanut ajornannginnerusinnaavoq,” Louise Holck, Inuit Pisinnaatitaaffii pillugit Instituttimi pisortaq oqarpoq.
Inuit Pisinnaatitaaffii pillugit suliniaqatigiiffiit taakku marluk ataatsimoorlutik arnat pisinnaatitaaffii pillugit ilisimasanik annertusaaniarput. Pingaartumik arnanut kinguaassiuutitigut innarliinerit nakuusernerillu nunatsinni ajornartorsiutaapput.
2019-imiilli angutit arnalu naligiissitaanissaat Killiliisamut atatillugu nunatsinni oqallisaavoq, ”Killiliisa”, MeToo-mit aallaaveqarpoq. Piffissami kingullermi oqaluttuarisaanermi arnat pisinnaatitaaffiinik innarliineq DR-ip spiralilersuineq pillugu aallakaatitassiaani saqqummiunneqarpoq.
Arnat pisinnaatitaaffii pillugit isumaqatigiissut atuaruminarsagaq Atlantikup Avannaamiuinut aningaasaliissutinit taperserneqarluni suliarineqarpoq.
PAASISSUTISSANIK PIVIUSUNIK ERSARISSAANEQ: Naalagaaffiit Peqatigiit Arnat Pisinnaatitaaffii pillugit Isumaqatigiissutaat, arnanik immikkoortitsinerit suulluunniit atorunnaarsinneqarnissaat pillugu isumaqatigiissut.