Kalaallit Nunaanni inuit pisinnaatitaaffii pillugit sullissiviit, innuttaasut pisinnaatitaaffii pillugit ilisimasat nukittorsarniarlugit suliniuteqarput
LGBT+ - it tassaapput immikkoortitaanermut annertunerusumik
illersorneqalernissamut qilanaalersinnaasut. 14. juli 2023 pisinnaatitaffitik pillugit Nuummi Nuuk Pride qulequtsikkami akerliussutsimik takutitsipput.
Ullumikkut Inuttut Pisinnaatitaaffinnut Instituttip Inatsisartunut ukiumoortumik nalunaarusiani, Kalaallit Nunaanni inuit pisinnaatitaaffiinik siuarsaanerup illersuinerullu qanoq ingerlanerannik takutitseqataasoq, saqqummiuppaa.
Nalunaarusiami spiralilersuisimaneq Kalaallit Nunaatalu Danmarkillu akornanni, sorsunnersuit aappaanniit ullumikkumut pissutsinik, oqaluttuarisaanikkut arlaannaannulluunniit attuumassuteqanngitsumik misissuinerup aallartinneqarnera, Inuttut Pisinnaatitaaffinnut Instituttip erseqqissarpaa.
”Inuit pisinnaatitaaffiinut tunngatillugu tamanna pitsaasumik ineriartorneruvoq, qulaajaanermilu misissuinermilu inuttut pisinnaatitaafiup qitiutinneqarnissaa innersuussutigittuinnarparput, ” Inuttut Pisinnaatitaaffinnut Instituttimi pisortaq Louise Holck siulequtsiussami taama allappoq.
Spiralilersuisimaneq pillugu misissuinermi, nammineq piumasarinngisaannik kalaallit niviarsiarartaannik arnartaannillu 1991-imiit maannamut spiralilersuinerit ilannguttariaqarnerat, erseqqissaarpaattaaq.
Kalaallit Nunaanni inuit pisinnaatitaaffii pillugit sullissiviit assigiimmik pineqarnissamik siuarsaapput
Nalunaarusiami, Kalaallit Nunaanni inuit pisinnaatitaaffiinik siuarsaanermi illersuinermilu suleqatigiinneq nukittooq, Kalaallit Nunaanni inuit pisinnaatitaaffii pillugit sullissivinnit- ilaatigut Kalaallit Nunaanni Inuit Pisinnaatitaaffii pillugit Siunnersuisoqatigiinnit pilersinneqartoq ukkanneqarportaaq.
” Kalaallit Nunaanni suleqatitta ilisimasaat siunnersuinerallu, inatsisinik politikkinillu, Kalaallit Nunaanni assigiimmik pineqarnissamik inuillu pisinnaatitaaffiinik siuarsaasussanik qulakkeerinissamut, piumasaqaataapput,” Louise Holck allappoq angusallu arlallit tikkuarlugit.
Ukiup kingulliup ingerlanerani, kinguaassiuutitigut pinngitsaaliisarneq pillugu inatsimmi akuersissuteqarnissamut piumasaqaat atuutilerpoq, tarnikkut nakuuserneq pineqaatissiissutaasinnaanngussaaq, Kalaallit Nunaannilu innuttaasut immikkoortitaanermut annertunerusumik illersugaalernissaq qilanaarisinnaanngorpaat.
Nalunaarusiami, Inuttut Pisinnaatitaaffinnut Instituttip Qivioq Løvstrøm, Kalaallit Nunaanni Inuit Pisinnaatitaaffii pillugit Siunnersuisoqatigiinni, Instituttip Kalaallit Nunaanni suleqatigisaani qaninnerpaami siulittaasoq, oqaaseqartippaa.
Allatseqarfik nukittunerusoq amerlanerusunut pisinnaatitaaffinnik ilisimasaqalersitseqataavoq
Qivioq Løvstrøm naapertorlugu, allatseqarfimmik nukittuumik Kalaallit Nunaanni Inuit Pisinnaatitaaffii pillugit Siunnersuisoqatigiinnik ikorfartuisumik pilersitsineq, innuttaasut pisinnaatitaaffitik pillugit ilisimasaannik annertunerulersitseqataavoq.
”Allatseqarfimmi inuit pisinnaatitaaffii pillugit ilisimasat, inuit pisinnaatitaaffii pillugit oqallinnernik ilinniartitsinernillu allanngorartitseqataasut, inerisarneqarput ingerlateqqinneqartarlutillu – Allatserqarfimmi suliat, inuit pisinnaatitaaffiisa siuarsarnissaat illersorneqarnissallu pillugit pisortanik politikerinillu oqaloqateqarnitsinnik, annertuumik nukittorsaaqataapput,” Qivioq Løvstrøm nalunaarusiami apersorneqarnermini taama oqarpoq.
Taassuma apeqqutit oqaluuserisassat suleqatigiissuteqarnerillu (workshops), ilaatigut inuit pisinnaatitaaffii pillugit Kalaallit Nunaannut naapertuuttunik oqaloqatigiinnernik pingaarutilinnik aallartitseqataasimasut, immikkut oqaatigai.
Inatsisartut kissaataat naapertorlugu, Inuttut Pisinnaatitaaffinnut Institutti 2014-imi maajimiit, Kalaallit Nunaanni inuit pisinnaatitaaffii pillugit sullissilerpoq. Kalaallit Nunaanni inuit pisinnaatitaaffiinik naliliinissaq siuarsaanissarlu suliassaraagut. Kalaallit Nunaanni iliuuseqartussat- pingaartumik Kalaallit Nunaanni Inuit Pisinnaatitaaffii pillugit Siunnersuisoqatigiit qanimut suleqatigalugit- taamaaliorpugut. Apriili qaammat Siunnersuisoqatigiit Inatsisartunut ukiumoortumik nalunaarusiartik saqqummiuppaat. Inuit pisinnaatitaaffii pillugit isummersuutaat uani atuakkit.