Kalaallit Nunaanni najugaqarfissatut – aamma ulloq unnuarlu neqeroorutini najugaqartut kinguaassiuutitigut innarlerneqarsinnaanermut illersorneqassapput
Inuit innarluutillit allanut naleqqiullutik – pingaartumillu najugaqarfissatut neqeroorutiniittut – kinguaassiuutitigut innarligaanissamut sanngiiffeqarnerujussuupput. Taamaammat pisortat pitsaaliuinermut tunngatillugu iliuuseqarnissaat, inunnullu kinguaassiuutitigut innarligaasimasunut ikiuunnissaat pingaaruteqarpoq.
Kalaallit Nunaani Inuit Pisinnaatitaaffii pillugit Siunnersuisoqatigiit, Inuit Innarluutillit Illersuisuat, Tilioq, kiisalu Inuttut Pisinnaatitaaffinnut Institutti nalunaarusiami nutaami ajornartorsiutinik ukkassipput, Kalaallit Nunaannilu najugaqarfissatut neqeroorutini najugaqartut kinguaassiuutitigut innarligaasinnaanermut qanoq pitsaanerusumik illersorneqarsinnaanerannut arlalinnik innersuussuteqarlutik.
”Inuit innarluutillit najugarqarfissatut- aamma ulloq unnuarlu neqeroorutini najugaqartut innarluuteqarnertik najugaqariaaserlu pissutigalugit marloriaammik sanngiiffeqarput. Taamaammat innarlerneqannginnissaannut qulakkeerinissamut pisortat annertusisamik akisussaaffeqarput,” Anja Hynne, Kalaallit Nunaanni Inuit Innarluutillit Illersuisuat oqarpoq.
Ilaatigut pisortat najugaqarfissatut neqeroorutini nakkutilliisariaqarput, inuillu innarluutillit kinguaassiuutitigut innarligaanermik isumannaatsumik nalunaarutiginninnissamut periarfissaqarnissaat qulakkeerlugu. Innarliisinnaanernik tamatumunngalu sioorasaarinernik pitsaaliuinissaq, pisortat akisussaaffigaattaaq.
Anigoruminaatsumik nalaatsinermi ikiorserneqarnissamut periarfissaqarneq
Kinguaassiuutitigut innarliinerit kinguneri sivisusinnaallutillu ilungersunarsinnaapput. Inuttut pissutsip allanngornera, annilaanganeq, tarnikkut nappaat nerisanut tunngatillugu eqqarsaatit anigorneq ajornartut, sinnarliorneq nalerisimaannginneq, kinguaassiuutitigut innarligaasunit misigineqarsinnaasartut ilaannamininnguaraat. Taamaammat inuit innarluutillit kinguaassiuutitigut innarlerneqarsimasut, anigoruminaatsumik nalaatalittut misigisamik suliarinissaannut naapertuuttumik ikiorserneqarnissamik neqeroorfigineqarnissaat pingaaruteqarpoq.
” Inuit innarluutillit kinguaassiuutitigut innarligaasimasut, tapersersorneqarnissaat piginnaanngorsaqqinnissamillu neqeroorfigineqarnissaat, inuttut pisinnaatitaaffinni qulakkeerneqarpoq. Tapersersorneqarneq, eqqugaasunut misigisat anigoruminaatsut timimut tarnimullu sunniutaasa qaangernissaannut inoqatinullu akuliuteqqinnissamut iluaqusiissaaq” Louise Holck, Inuttut Pisinnaatitaaffinnut Institutimi pisortaq oqarpoq.
Naalagaaffiit Peqatigiit Inuit Innarluutillit pillugit Isumaqatigiissutaat Kalaallit Nunaannit akuerineqarpoq, 2022-imilu Istanbulimi isumaqatigiissutip- tassaasup arnanut nakuusertarnermik angerlarsimaffimmilu nakuusertoqartarneranik pitsaaliuineq akiuiniarnerlu pillugit Europami Siunnersuisoqatigiit isumaqatigiissutaata akuerineqarnissaa aalajangiunneqarluni. Taamaalillutik pisortat, inunnut innarluutilinnut nakuuserneq atornerluinerlu sunaluunniit pitsaaliniarlugit naapertuuttunik tamanik iliuuseqarnissamut, imminnut pisussaaffilerput.