Inuit pisinnaatitaaffii pillugit politikkikkut ukkatarinninneq annertusivoq, unammilligassalli suli annertupput
Ukiuni kingullerni Kalaallit Nunaanni inuit pisinnaatitaaffii pillugit ukkatarinninnerup annertunersimanera takusinnaagaluaripput, suli unammilligassaqarpoq, pingaartumik meeqqat inuusuttullu tunngaviusumik pisinnaatitaaffii pineqartillugit. Tamakku Inuit Pisinnaatitaaffii pillugit Instituttip 2020-2021-mi sulinerput kiisalu Kalaallit Nunaanni inuit pisinnaatitaaffii pillugit ineriartorneq pillugu Inatsisartunut nalunaarusiaani immikkoortut pingaarnerit ilaagaat.
Nalunaarusiaq instituttip Kalaallit Nunaanni sulinitsinnut, nunamilu inuit pisinnaatitaaffii pillugit siuarsaalluni illersuiniarlunilu sulinerup qanoq ingerlanersoq pillugu, ilaatigut Kalaallit Nunaanni Inuit PIsinnaatitaaffii pillugit Siunnersuisoqatigiit suleqatigalugit ukiumoortumik takussutissartaraa.
Isumaginninnermik suliassaqarfimmi suli unammillernartunik peqarpoq
Kalaallit Nunaanni meeqqat inuusuttullu atugarliortut pillugit suliniutit nukittorsarniarlugit Naalakkersuisut kiisalu Danmarkimi naalakkersuisut suleqatigiinnerat ingerlaannarpoq. Ilaatigut isumaginninnermik suliassaqarfiup iluani meeqqat pillugit suliat suliarineqanngitsut ikilisarniarlugit anguniagaqarluni suliaqarneq naammassineqarnikuuvoq. Kommuninili sulianik suliaqarnermi suli unammillernartoqarpoq, suleqatigiinnermilu suliniutit malittareqqinneqarnissaannut paasissutissanik amigaateqartoqarluni.
Kalaallit Nunaannittaaq ineqarneq pillugu suliassaqarfimmi arlalinnik ajornartorsiuteqartoqarpoq. Innuttaasut amerliartuinnartut aalajangersimasumik najugaqanngillat, inissianillu inisseeqqittarfinnik pissutsinillu amigaateqartoqarpoq. Institutti Kalaallillu Nunaanni Inuit Pisinnaatitaaffii pillugit Siunnersuisoqatigiit innuttaasut angerlarsimaffeqanngitsut pillugit nuna tamakkerlugu iliuusissatut pilersaarummik ujartuipput.
Amerlanerit pisinnaatitaaffitik ilisimassavaat, taamaasillutik pissaaneqartunut, taamaattumillu akisussaasunut itigartitsisinnaassagamik kiisalu taakkunannga illersorneqarnissamut piumasaqaateqarsinnaassagamik
Atuartitsineruneq pitsaanerusumillu atuartitsisarneq pisariaqartinneqarput
Ukiumi siusinnerusukkut Inuit Pisinnaatitaaffii pillugit Institutti aamma Kalaallit Nunaanni Inuit Pisinnaatitaaffii pillugit Siunnersuisoqatigiit nalunaarusiamik, Kalaallit Nunaanni ilinniartitaanermik suliassaqarfimmi suli annertuunik unammillernartoqartoq pillugu ersersitsisumik saqqummersitsipput.
Nalunaarusiami ilaatigut nunaqarfinni ilinniartitsisunik amigaateqarneq, immikkut atuartitsisarnermi piginnaasat ikittut aammalu inuusuttut ilinniarfiini atuarnerminnik unitsitsiinnartartut procentiisa qaffasinnerujussuat unammillernartutut tikkuarpagut.
Inuit Pisinnaatitaaffiisa ilisimaneqarnerat nukittorsarneqassaaq
2021-mi instituttip Ilisimatusarfimmik aamma Kalaallit Nunaanni Inuit Pisinnaatitaaffii pillugit Siunnersuisoqatigiinnik inuit pisinnaatitaaffii pillugit ilisimasaqarneq nukittorsarniarlugu attatiinnarniarlugulu suleqatigiinnermik aallartitsivoq. Tamanna ilaatigut pissaaq Kalaallit Nunaannut atatillugu inuit pisinnaatitaaffii pillugit digitaliusumik atuartitsinermi atortutigut pikkorissartitsinikkullu.
”Kalaallit Nunaanni Inuit Pisinnaatitaaffii pillugit Siunnersuisoqatigiit ilaatigut suleqatigalugit, Kalaallit Nunaanni inuit pisinnaatitaaffiinik ilisimasaqarnerup tapersersuinerullu annertusarnissaanik suliaqarneq uatsinnut pingaaruteqarpoq. Amerlanerit pisinnaatitaaffitik ilisimassavaat, taamaasillutik pissaaneqartunut, taamaattumillu akisussaasunut itigartitsisinnaassagamik kiisalu taakkunannga illersorneqarnissamut piumasaqaateqarsinnaassagamik,” nassuiaavoq Louise Holck, Inuit Pisinnaatitaaffiinut Insituttimi pisortaq.
2021-mi institutti Nuummi allaffimmik ataatsimik sulisoqartumik ammaavoq, suleqatigisagut peqatigalugit Kalaallit Nunaanni inuit pisinnaatitaaffii pillugit ilisimasanik siuarsaasussamik.
Inuit Pisinnaatitaaffii pillugit Institutti Kalaallit Nunaanni inuit pisinnaatitaaffii pillugit sullissiviuvoq. Tamanna isumaqarpoq, instituttip Kalaallit Nunaanni inuit pisinnaatitaaffiinik illersuillunilu siuarsaasussaaneranik, kiisalu inuit pisinnaatitaaffiisa qanoq naammassineqarnerinik nakkutiginnittussaalluni.
Sulinitsinni immikkoortoq pingaarutilik tassaavoq nunami inuit pisinnaatitaaffii pillugit unammillernartunik annerpaanik pinaveersaartitsiniarluni sulinermi, Kalaallit Nunaanni sullissivinnik kattuffinnillu, pingaartumik Kalaallit Nunaanni Inuit Pisinnaatitaaffii pillugit Siunnersuisoqatigiinnik suleqateqarneq.